পুৰাতন সেউজীয়া

বসন্তৰ এটি ৰাতিপুৱা,
স্বপ্ন-দিঠকৰ আলিদোমোজাত
দেখিছিলো তোমাক |
তোমাক দেখিয়েই

লঠঙা গছবোৰত
ফুলিছিল হৃদয় ৰঙৰ
ফুলবোৰ |
আৰু মই থমকি ৰৈছিলো,
পুৰাতন সেই আলিত;
য’ত পাৰি থোৱা আছিল
তলভৰি সৰা শুকান পাতৰ
এখন দলিচা |
মই জানো, এই বাটেৰে গ’লেই পাম,
পুৰাতন সেই সেউজীয়া দেশ |


ৰচনাকাল- ০৬ এপ্ৰিল ২০১০ (২১ বছৰ)

তেওঁক এইবাটে অহা দেখিছিলোঁ

তেওঁক এইবাটে অহা দেখিছিলোঁ ;
তেওঁ কোনদিশে গ’ল, নেজানো |


পলাশ, মদাৰৰ আৰু শিমলুৰ
ডালত সেইবোৰ কিহৰ নিচান ?
ঔ-জোপাৰ তলত শুকান পাতৰ
খৰখৰনি শব্দ |


ক’ৰবাৰ পৰা উৰি অহা দুটি
ফেঁচু চৰাই, উৰি গ’ল কেনিবা !


ফাগুনী পছোৱাজাকে কোবাই যোৱা
বিজুলী বাঁহৰ আগবোৰ লৰিছে |
পথাৰৰ মাজৰ আঁহতজোপাত
এটিও পাত নাই |


তেওঁক এইবাটে অহা দেখিছিলোঁ
তেওঁৰ পিছে পিছে গ’ল নেকি,
আঁঘোণৰ সোণবৰণীয়া ৰ’দ আৰু
পুহ-মাঘৰ শীতাৰ্ত সন্ধিয়াবোৰ ?


বাৰীৰ চুকৰ ঔ-জোপাৰ তলত
এজাক শালিকাৰ কোলাহল |
তেওঁক এইবাটে অহা দেখিছিলোঁ ;
তেওঁ কোনদিশে গ’ল, নেজানো |


ৰচনাকাল-০২ জানুৱাৰী ২০০৮ (১৯ বছৰ)